Hvað er hringrásarhagkerfi? Við fáum svar við því. Einnig veltum við fyrir okkur verðmætunum sem eru fólgin í öllum textílnum í kringum okkur og hittum hugmyndaríkt fólk sem leitar leiða til þess að nýta hann vel og lengi.
Hvað ef hægt væri að breyta gömlum raftækjum í húsgögn, fatnað, nammifelutæki og tónlist? Jafnvel gera við þau ef þau bila?
Stjörnukokkur slær upp veislu úr hráefnum sem hefðu annars endað í ruslinu og við hittum ruslara sem dýfa sér í gáma í leit að mat. Á Hallormsstað eru eldaðar krásir úr hráefnum sem alla jafna er fúlsað við og hjá Landgræðslunni í Gunnarsholti eru gerðar tilraunir til uppgræðslu með ýmsum brögðum.
Er hægt að byggja hús úr rusli? En hampsteypu eða hráefnum sem voru einu sinni í öðru húsi? Eru gömul húsgögn jafngóð og ný?
Er hægt að lifa plastlausu lífi? Þarf að breyta kerfunum sem við búum við til að auðvelda okkur að vera umhverfisvæn?
Hefðbundinni brúðkaupsveislu fylgir ýmiss konar neysla; t.d. í textíl og skreytingum. Við skorum á brúðhjón að halda veislu í anda hringrásarhagkerfisins – og þau vinda sér í verkið.