Hjónin Felix og Klara eru eldri borgarar sem búa í rótgrónu hverfi. Þau eiga þrjú börn og þó nokkur barnabörn sem Felix þekkir illa í sundur. Þegar heilsu Klöru hrakar tekur fjölskyldan ákvörðun um að tími sé kominn á breytingar – eitthvað sem Felix er mjög ósáttur við.
Felix og Klara selja húsið sitt og flytja í þjónustuíbúð fyrir aldraða. Klara kynnist fljótt hressum nágrönnum þeirra en Felix lendir upp á kant við allt og alla.
Felix lokar augunum fyrir áfengisneyslu Klöru og reynir að finna sér ný verkefni með slæmum afleiðingum.
Klara ræðir við Felix um nándarleysi þeirra og vill að þau stundi aftur kynlíf eins og aðrir í kringum þau. Þegar nágranninn Reynir daðrar við Klöru ákveður Felix að gera eitthvað í málunum.
Barnabarn Felix og Klöru fær bílinn þeirra lánaðan á meðan hjónin fara með rútu í kórferðalag á Sólheima í Grímsnesi. Felix hefur svo miklar áhyggjur af bílnum að hann er andlega fjarverandi alla ferðina.
Þegar Klara vill losna við borðspilasafn sem fyllir geymsluna þeirra fær Felix þá hugmynd að útbúa spilasal í húsinu og safnar enn fleiri spilum, Klöru til mikillar mæðu. Felix er ósáttur við matinn í mötuneytinu og ákveður að gera þorramat með skelfilegum afleiðingum.
Klara liggur á spítala eftir slys á heimilinu og Felix er einn og eirðarlaus heima á meðan, ófær um að sjá um sig sjálfur. Hann ákveður að útbúa veislu í tilefni af afmælinu sínu en dagurinn þróast ekki eins og hann hafði vonað.
Klara reynir að ræða hjónabandið við Felix við litlar undirtektir. Á sama tíma skipuleggur fjölskyldan inngrip vegna áfengisneyslu hennar.
Heimilið er í óreiðu og Klara neitar að koma heim í óbreytt ástand. Felix þrjóskast við en grípur að lokum til aðgerða til að koma til móts við Klöru með ófyrirséðum afleiðingum.
Það líður að því að Klara komi heim af spítalanum og fjölskyldan þrýstir á Felix að horfast í augu við meðvirkni sína.