Ladina na vul avair da far nagut cun sia famiglia da medias in pau curiusa che abita a Cuira. Ella fa pli gugent attent als problems globals a Turitg – dentant senza success. Cura che Ladina survegn nunspetgadamain la chaschun da salvar la cultura rumantscha cun l’apparat da medias famigliar, sto ella sa decider e far sacrifizis.
Sco nova scheffa da la «Posta» transfurma Ladina la gasetta rumantscha tenor sias ideas e valurs. Quai na plascha betg a las lecturas ed als lecturs da tschep. Il dumber d’abunaments sa reducescha fitg. Gion, aug da Ladina e grande capo da las medias, vul perquai serrar la Posta. El metta Ladina sut squitsch. Dolurusamain constatescha Ladina ch’ella n’è anc betg pronta per il cumbat instradà.
Ladina sa decida da cumbatter ed ella ha mo ina finamira: eliminar Caprez, ses rival stgiffus. Il regl da vendetga da Ladina spaventa la redacziun da la Posta, ma fa era vegnir a la glisch misteris: Caprez e Gion, l’aug da Ladina, èn involvids en in project da construcziun da plirs milliuns en las muntognas grischunas. Quel vegn dentant zuppentà da la publicitad. Ina scuverta sco fatga per Ladina. Ella sa prepara per l’attatga.
La rapportaziun da Mountainville, il project da construcziun da plirs milliuns dispitaivel, porta a la Posta il success giavischà gia daditg. Gion è sut squitsch dals investurs e reagescha cun replicas en la gasetta tudestga da las Medias Grischunas, la Bündner Zeit. La consequenza è ina guerra tranter las medias. Ladina sa serva da metodas adina pli maltscheccas per pudair subsister cun la Posta cunter la Bündner Zeit pussanta e per cumbatter il project Mountainville.
A Ladina èsi reussì da metter en moviment insatge e da mobilisar la publicitad cunter il project Mountainville. Cura che Gion emprova da far in ultim rampign per derscher Ladina, sacrifitgescha ella tut per gudagnar. Tuttina vegn ella en las stretgas: tge pretsch è ella pronta da pajar per il success?
Ils problems finanzials da las Medias Grischunas mettan Gion sut squitsch. Ma vender la chasa da medias na vegn betg en dumonda per el. Andrietta fa quitads, ella vul pudair cundecider dapli, i va la finala per l’image da la famiglia. Cun sia nova gasetta «L’ultim Rumantsch» scuvra Ladina istorgias da famiglia sombras en tut il chantun. Cura che vegn en il visier da Ladina era la possessura d’hotel Bonifazi, sajetta quella enavos. L’emprim duai la famiglia Durisch far urden en l’agen tschaler, avant che ir vi dal sieu. I va per GP Durisch – il patrun e fundatur da las Medias Grischunas ch’è mort.
Las maschinas da stampar van en paglia pervi da mancanza da mantegniment ed il persunal da las Medias Grischunas rebellescha. Gion bagatellisescha tut e fugia en in’affera cun ina collavuratura da la concurrenza. Andrietta emprova da salvar l’image da las Medias Grischunas e prepara ina gronda exposiziun davart GP Durisch. Ladina però sa metta cunter sia redacziun e va a la tschertga da las baras en il tschaler da la famiglia. Clandestinamain engascha ella ses anteriur schefredactur ed ex-lover Corsin da retschertgar l’istorgia.
Cura che Andrietta envida da Nadal la famiglia, sa mussan dirs conflicts. Entant che Andrietta emprova da mantegnair la pasch en chasa, s’occupa Gion da sia affera. Andrietta è irritada da ses regal e Ladina chatta ina brev misteriusa en tschaler – in fastiz che maina ella a Genua.
Ladina e Corsin suondan ils fastizs a Genua e chattan il toc che manca. Entant organisescha Andrietta in event d’investurs per survegnir novs daners per las Medias Grischunas. Gion ha dentant gia fatg memia bler donn, l’eveniment finescha en in fiasco. Cura che Ladina confrunta Andrietta e Gion cun sia scuverta, sballuna tut.
Nagut n’è sco quai ch’igl era ina giada. U forsa bain? Gion chatta sustegn tar ses figl e sa decida per l’emprima giada sapientivamain per la famiglia. Entant vala per Andrietta per l’emprima giada il persunal dapli che l’image da las Medas Grischunas. Era Ladina sto sa decider. Pussanza u vardad? Il maletg da famiglia sa cumpona da nov.
