Season 9

Die Groot Skeurvallei is 'n naam wat in die laat 19de eeu deur die Britse ontdekkingsreisiger John Walter Gregory gegee is aan die aaneenlopende geografiese sloot, ongeveer 6 000 kilometer lank wat van sentraal-Mosambiek in Suidoos-Afrika tot in Noord-Sirië loop. Die Oos-Afrikaanse skeur het twee takke, die Westelike Skeurvallei en die Oos-skeurvallei. Die Westelike Skeur, ook genoem die Albertine Skeur, word omring deur van die hoogste berge in Afrika, insluitend die Virunga-berge, Mitumba-berge en die Ruwenzori-reeks. Dit bevat die Skeurvallei-mere, wat van die diepste mere in die wêreld insluit (tot 1 470 meter diep by die Tanganjikameer). Aangesien die mere in die Oostelike Skeur geen uitlaat na die see het nie en geneig is om vlak te wees, het hulle 'n hoë mineraalinhoud aangesien die verdamping van water die soute agterlaat. Die Skeurvallei wissel meestal tussen 600 en 900 meter diep, met 'n maksimum van 2 700 meter by die Gikuyu- en Mau-platorand.